ယဉ်ကျေးမှုနှင့် သဘာဝအမွေအနှစ်များသည် လူသားမျိုးနွယ်တို့၏ အဖိုးတန်ရတနာများပင်ဖြစ်ပြီး လူ့ယဉ်ကျေးမှုဖလှယ်ခြင်းနှင့် ယဉ်ကျေးမှုများ အပြန်အလှန် လေ့လာသင်ယူခြင်းတို့ကို ပိုမိုမြှင့်တင်ပေးသည့် အရေးပါသော ကြားခံတစ်ခုလည်း ဖြစ်သည်။ ရန်ကုန်တရုတ်ယဉ်ကျေးမှုစင်တာသည် တရုတ်-နိုင်ငံတကာ ယဉ်ကျေးမှုဖလှယ်ဆက်ဆံရေးစင်တာ၊ ကျီလင်ပြည်နယ် (Jilin) ယဉ်ကျေးမှုနှင့် ခရီးသွားလာရေးဦးစီးဌာနတို့နှင့်အတူ ပူးပေါင်း၍ တရုတ်နိုင်ငံ ကျီလင်ဒြပ်မဲ့ယဉ်ကျေးမှုအမွေအနှစ်ကဏ္ဍတွဲ ဗီဒီယိုအတိုများကို တင်ဆက်ပြီး ကမ္ဘာတစ်ဝှမ်းသို့ ကျီလင်ပြည်နယ်၏ တစ်မူထူးခြားသော ယဉ်ကျေးမှုအလှတရားများကို ပြသသွားမည် ဖြစ်ပါသည်။

စားဖွယ်ရာများပုံဖော်ခြင်းအတတ်ပညာနှင့် ထမင်းစားပွဲထက်မှ ကျီလင်ပြည်နယ်

ကျီလင်ဟင်းလျာများသည် တရုတ်အစားအသောက်စာရင်းမှတ်တမ်းထဲတွင် သူမတူအောင် ထူးခြားလှပေသည်။ အသုံးပြုသည့် ကုန်ကြမ်းပစ္စည်း ရိုးရှင်းပြီး ချက်ပြုတ်နည်းပေါင်း မျိုးစုံရှိပါသည်။ ရွှီကျီဆန်း (Xu Jisheng)သည် စားဖွယ်ရာများဖြင့် ကျီလင်ပြည်နယ်၏ သဘာဝရှုခင်းအလှနှင့် ရိုးရာဓလေ့များကို အနုပညာဆန်ဆန် ပုံဖော်ကာ ထမင်းစားပွဲထက်၌ ဆန်းသစ်စွာ ခင်းကျင်းပြသထားပါသည်။

လက်ဖျားထိပ်မှ အမဲလိုက်ခြင်းနှင့် တံငါလုပ်ခြင်းယဉ်ကျေးမှု

ချာကန်ရေကန်(Chagan)ငါးအရေခွံပန်းချီကားသည် တရုတ်နိုင်ငံတွင် လျောင်ခေတ်၊ ကျင်းခေတ်မှ စတင်၍ ပေါ်ပေါက်ခဲ့ပါသည်။ အသုံးပြုသည့်ကုန်ကြမ်းမှာ ထူးခြားပြီး အဓိကအားဖြင့် ခေါင်းကြီးငါးကြင်း၊ ငါးကြင်း၊ ငါးရံ့စသည့် ငါးများ၏ အရေခွံများကို အသုံးပြုပါသည်။ ရွှီချွေ့ (Xu Cui)သည် ချာကန်ရေကန်ငါးအရေခွံပန်းချီကား ပြုလုပ်ခြင်းအတတ်ပညာ၏ အမွေဆက်ခံသူဖြစ်သည်။ သူမ၏ လက်ရာများသည် ရှေးကျသော အမဲလိုက်ခြင်းနှင့် တံငါလုပ်ငန်းယဉ်ကျေးမှုအား ပိုမိုကျယ်ပြန့်တွင်ကျယ်စေခဲ့ပါသည်။ 

တရုတ်နိုင်ငံအရှေ့မြောက်ပိုင်းဒေသမှ ကျန်း(Zhang)မျိုးနွယ် ရွှံ့စေးရုပ်အတတ်ပညာ

ရွှံစေးရုပ်ပြုလုပ်ခြင်းအတတ်ပညာသည် တရုတ်နိုင်ငံ၏ ရှေးကျသော အနုပညာတစ်မျိုးဖြစ်သည်။ “တရုတ်နိုင်ငံအရှေ့မြောက်ပိုင်းဒေသမှ ကျန်း(Zhang)မျိုးနွယ် ရွှံ့စေးရုပ်အတတ်ပညာ” အမွေဆက်ခံသူ ကျန်းကျင်းတုန်း (Zhang Jindong)သည် တရုတ်နိုင်ငံ အရှေ့မြောက်ပိုင်းဒေသ၏ ဓလေ့ရိုးရာဆိုင်ရာ ရွှံ့စေးရုပ်လက်ရာများကို အရေအတွက်ထောင်ချီ၍ ဖန်တီးပြုလုပ်ခဲ့ပါသည်။ ၎င်းလက်ရာများသည် ဇာတိမြေလွမ်းဆွတ်ခြင်းအပြင် အဖိုးတန်အမှတ်တရများနှင့် ယဉ်ကျေးမှုအဓွန့်ရှည်တည်တံ့ခြင်းများကို ကိုယ်စားပြုနေပါသည်။

မန်ချူးရိုးရာစက္ကူအလှညှပ်ပညာ ကမ္ဘာတစ်လွှားသို့ပြန့်စေရာ

မန်ချူးရိုးရာ စက္ကူအလှညှပ်ခြင်းအတတ်ပညာသည် မန်ချူးယဉ်ကျေးမှုနောက်ခံနှင့် နေထိုင်မှုပတ်ဝန်းကျင်အပေါ်တွင် အမှီပြုနေပြီး အဓိကအားဖြင့် တရုတ်နိုင်ငံ အရှေ့မြောက်ပိုင်းဒေသ၏ ရိုးရာဓလေ့ထုံးတမ်းများနှင့် အလေ့အထများကို ထင်ဟပ်ဖော်ပြနေပါသည်။ ရန်ရွှယ်လိန် (Yan Xueling)သည် ဟွိုင်တယ်ရှေးဟောင်းဒေသ (Huaide)၏ မန်ချူးရိုးရာ စက္ကူအလှညှပ်အတတ်ပညာကို အမွေဆက်ခံသည့် စတုတ္ထမြောက်မျိုးဆက် ဖြစ်ပါသည်။ သူမသည် ဒေသရိုးရာယဉ်ကျေးမှုကို ဖော်ထုတ်ပြသသည့် တစ်ချိန်တည်းတွင်ပင် အကြောင်းအရာသစ်များစွာကို လေ့လာဖန်တီးခဲ့ပြီး လူငယ်ပရိသတ် အများအပြား၏ နှစ်သက်အားပေးခြင်းကို ရရှိထားပါသည်။