ရိုးရာဓလေ့ထုံးတမ်း အစဉ်အလာများ

ရှေးခေတ်အခါက လယ်ယာစိုက်ပျိုးရေးလုပ်ငန်းများတွင် ဆည်ရေသွင်းခြင်းသည် အလွန်အရေးပါ အရာရောက်လှပေသည်။ သို့သော် တောင်ကုန်း‌ ဒေသများတွင်မူ မြေမျက်နှာသွင်ပြင် အနေအထား မြင့်မား၍ ဆည်ရေသွင်း စိုက်ပျိုးရန် အဆင်မပြေသောကြောင့် နောက်ပိုင်းတွင် ရေကို မြေနိမ့်ရာမှ မြေမြင့်ရာသို့ ဆွဲတင်နိုင်သော ရေဒလက်စက်ကို တီထွင်ခဲ့ကြသည်။ “သီးနှံ ပြည့်ဖြိုး အောင်မြင်စ ရာသီချိန်” တွင် ရေဒလက်စက် နတ်မင်းကို ပူဇော်ကန်တော့သည့် အလေ့အထရှိပြီး ထိုနှစ်အတွက် မိုးရေများ အပြည့်အလျှံ ရရှိကာ လယ်ယာသီးနှံများ ဖြစ်ထွန်း အောင်မြင်နိုင်စေရန် ရည်ရွယ်မျှော်လင့်ပါသည်။

“ပိုးချည်နတ်” သည် ဤ “သီးနှံ ပြည့်ဖြိုးအောင်မြင်စ ရာသီချိန်” တွင် ဖွားမြင်လာသည် ဟူ၍ ဆိုကြသည်။ အမျိုးသားများ လက်ထွန်ယက်ပြီး အမျိုးသမီးများ ရက်လုပ်ငန်း ရက်လုပ်ကြသည့် တရုတ် ရှေးရိုးရာ လူ့ဘောင်အဖွဲ့အစည်းတွင် ပိုးချည်မျှင်သည် တရုတ်နိုင်ငံ တောင်ပိုင်းဒေသများ၊ အထူးသဖြင့် ယန်စီမြစ် တောင်ပိုင်းရှိ ကျန်းစူးနှင့် ကျဲ့ကျန်းပြည်နယ်များ၏ ရက်ကန်းလုပ်ငန်းအတွက် အရေးကြီးသော ကုန်ကြမ်းတစ်မျိုး ဖြစ်ပြီး အိမ်တိုင်းနီးပါး ပိုးမွေးမြူရေးကို လုပ်ကိုင်ကြပါသည်။ ပိုးကောင်သည် အလွန် ဂရုစိုက် ထိန်းသိမ်းမွေးမြူရပြီး ရှေးအခါက ပိုးကောင်ကို “သဘာဝက ချီးမြှင့်သော ရတနာ”ဟူ၍ပင် သတ်မှတ်ကြပါသည်။  သို့ဖြစ်၍ သီးနှံ ပြည့်ဖြိုးအောင်မြင်စ ရာသီချိန်ဝန်းကျင်၌ “ပိုးချည်နတ်အား ပူဇော်ကန်တော့ခြင်း” ဓလေ့ရှိပြီး ပိုးမွေးမြူရေးလုပ်ငန်း အဆင်ပြေ အောင်မြင်စေရန် ဆုတောင်းလေ့ ရှိကြသည်။

တရုတ်နိုင်ငံမြောက်ပိုင်း အချို့ဒေသများတွင် ဤရာသီချိန်၌ ဂျုံပင်များ ရင့်မှည့်စ ပြုလာပြီ ဖြစ်ကာ တောင်သူလယ်သမားဦးကြီးများက ယာထဲမှ စိမ်းတစ်ဝက် မှည့်တစ်ဝက် ဂျုံနှံများကို ခူးဆွတ်လာပြီး မီးဖိုပေါ်တွင် ကျက်အောင် ကင်၍ ကလေးများအား ကျွေးမွေးကြပါသည်။ ဂျုံနှံကင်သည် တရုတ်နိုင်ငံ မြောက်ပိုင်းသားများ၏ ငယ်စဉ်အခါ ကလေးဘဝ မမေ့နိုင်ဖွယ် အမှတ်တရများ ဖြစ်လာရခြင်းမှာ ဤအလေ့အထသည် ပျော်ရွှင် စိတ်ဝင်စားဖွယ် ကောင်းရုံသာမက လယ်သမားများ၏ လယ်ယာသီးနှံ အထွက်တိုး အောင်မြင်လိုသည့် ဆန္ဒမွန်ကိုလည်း ထင်ဟပ် ဖော်ပြနေပါသည်။

အ‌လေ့ကျပေါက် ဟင်းရွက်ပင်များ စားသုံးခြင်းသည်လည်း “သီးနှံ ပြည့်ဖြိုးအောင်မြင်စ ရာသီချိန်” ၏ ဓလေ့တစ်မျိုး ဖြစ်ပြီး အခါးဓာတ် အနည်းငယ်ပါသော အစားအစာများကို စားသုံးပေးခြင်းသည် အကောင်းဆုံးပင် ဖြစ်သည်။ ဤရာသီချိန်တွင် မုန်ညင်းခါးကို စားသုံးပေးသင့်ပြီး မုန်ညင်းခါးကို ကြော်ချက်၍ သော်လည်းကောင်း၊ ဟင်းရည်ပြုတ်သောက်၍ သော်လည်းကောင်း ပြုလုပ် သုံးဆောင်နိုင်ပါသည်။ မုန်ညင်းခါးရှိ အခါးဓာတ်တွင် အဖန်ဓာတ်လေး ပါဝင်နေပြီး ထိုဖန်သော အရသာထဲတွင် ချိုသောအရသာ ထပ်မံ ပါရှိနေခြင်းကြောင့် လတ်ဆတ်၍ အရသာရှိလှပါသည်။ လူ့ခန္ဓာကိုယ်အတွက် လိုအပ်သော ဗီတာမင်ဓာတ်များစွာနှင့် သတ္တုဓာတ်၊ သကြားဓာတ် စသည့် အာဟာရဓာတ်များ ကြွယ်ဝစွာ ပါဝင်ပြီး အပူငြိမ်း သွေးအေး၍ အဆိပ်အတောက်များ ပြေစေနိုင်စွမ်း ရှိပါသည်။