ထူးခြားစုံလင် တရုတ်မြန်မာပွဲတော်ရက်သဘင် - “စာတော်ပြန်ပွဲ”
ယနေ့ မိတ်ဆက်ပေးမှာကတော့ မြန်မာ့ရိုးရာ ဆယ့်နှစ်လ ရာသီပွဲတော်များ အနက်မှ “နယုန်လ စာတော်ပြန်ပွဲ” အကြောင်းပဲ ဖြစ်ပါတယ်။
နယုန်လသည် မြန်မာပြက္ခဒိန် ဆယ့်နှစ်လတွင် တတိယမြောက် လရာသီ ဖြစ်ပြီး ပုံမှန်အားဖြင့် မေလကုန်နှင့် ဇွန်လဆန်း အချိန်များ အကြားတွင် ကျရောက်လေ့ ရှိပါသည်။
ရှေးယခင်က နယုန်လကို “နံယုန်”ဟု ရေးသားကြသည်ကို တွေ့ရပြီး “နံ”ဟူသည် “အချိန်၊ အခါ၊ ကာလ”ဟု အဓိပ္ပာယ်ရ၍ “ယုန်”ဟူသည် “စီးကျသည်၊ ရွာကျသည်”ဟု အဓိပ္ပာယ်ရသောကြောင့် “နယုန်လ”ဆိုသည်မှာ “မိုးရွာသွန်းသည့်လ”ဟူသော အနက်အဓိပ္ပာယ် ရှိပါသည်။ ဤကာလတွင် မြန်မာနိုင်ငံ၌ ပူပြင်းခြောက်သွေ့သော နွေရာသီမှ မိုးစက်မိုးပေါက်များ စတင်ရွာသွန်းစပြုလာ၍ စိုစွတ်အေးမြသော ရာသီသို့ ကူးပြောင်းစပြုလာပြီ ဖြစ်သည်။
ဗုဒ္ဓဘာသာ နိုင်ငံဖြစ်သော မြန်မာနိုင်ငံတွင် ပရိယတ္တိသာသနာ တိုးတက်ပြန့်ပွားစေရန်နှင့် သာသနာ့ အကျိုးပြု ဆရာတော်များ ပေါ်ထွန်းလာစေရန် အလို့ငှာ စာပြန်ပွဲကို နယုန်လ၏ ရာသီပွဲအဖြစ် ရှေးဘုရင်မင်းများ လက်ထက်ကပင် ကျင်းပလာခဲ့ကြပါသည်။ ပရိယတ္တိသာသနာနှင့် ပရိပတ္တိသာသနာ ထွန်းကားရေးအတွက် လုပ်ဆောင်ရန်မှာ ထေရဝါဒ ဗုဒ္ဓသာသနာတော် ရဟန်း သံဃာတော်များ၏ ကြီးလေးသော တာဝန်ဝတ္တရားများပင် ဖြစ်ပါသည်။ စာတော်ပြန်ပွဲတွင် ပိဋကတ်သုံးပုံဖြစ်သော သုတ္တန်ပိဋကတ်၊ ဝိနယပိဋကတ်နှင့် အဘိဓမ္မာပိဋကတ်များကို ဖြေဆိုရပြီး အာဂုံဆောင် ရွတ်ဖတ်ခြင်းနှင့် ပါဠိအနက်အဓိပ္ပာယ်များ ဖြေဆိုခြင်း ဟူ၍ ပုံစံနှစ်မျိုး ပါဝင်ပါသည်။
ဤစာမေးပွဲသည် ဓမ္မခန္ဓာ အရေအတွက် (၈၄၀၀၀)နှင့် သန်းပေါင်းများစွာသော ပါဠိစာပေများ ပါဝင်သည့် ပိဋကတ်သုံးပုံ ပါဠိတော်ကျမ်းစာပေများကို ကျက်မှတ်ဖြေဆိုရခြင်း ဖြစ်ပြီး ဝင်ရောက်ဖြေဆို အောင်မြင်သော စာမေးပွဲအဆင့်အလိုက် မတူညီသော ဂုဏ်ထူးဘွဲ့နှင့် ဘွဲ့အဆင့်များကို ရရှိနိုင်မည် ဖြစ်ကာ အမြင့်ဆုံးသော အဆင့်မှာ “ဓမ္မဘဏ္ဍာဂါရိက” ဘွဲ့တော် ဖြစ်ပါသည်။ ဤဓမ္မစာမေးပွဲကို သံဃာတော်၊ သီလရှင်များ သာမက အရပ်သားများလည်း ဝင်ရောက်ဖြေဆိုနိုင်ပါသည်။
တိပိဋကဓရ ရွေးချယ်ရေး စာမေးပွဲသည် အလွန်ခက်ခဲနက်နဲ၍ အကျယ်ပြန့်ဆုံးနှင့် အဆင့်အမြင့်ဆုံးသော စာမေးပွဲပင် ဖြစ်သည်။ စာတော်ပြန်ပွဲသည် ကမ္ဘာပေါ်တွင် အချိန်အကြာရှည်ဆုံး စာမေးပွဲ ဖြစ်ပြီး စာမေးပွဲ ဖြေဆိုချိန် အစအဆုံးမှာ (၅)နှစ်ကြာမြင့်ပါသည်။ ပထမနှစ်နှစ်တွင် ဝိနယပိဋကတ်၊ တတိယနှစ်တွင် သုတ္တန်ပိဋကတ်နှင့် နောက်ဆုံးနှစ်နှစ်တွင် အဘိဓမ္မာပိဋကတ်များကို ဖြေဆိုရပါသည်။
မြန်မာနိုင်ငံတွင် ပထမဦးဆုံးသော ဓမ္မဘဏ္ဍာဂါရိက ဘွဲ့တော်ကို ဖြေဆိုအောင်မြင်သူမှာ မင်းကွန်းဆရာတော် ဦးဝိစိတ္တသာရာဘိဝံသ ဖြစ်ပါသည်။ ၁၉၈၅ ခုနှစ်တွင် ထုတ်ဝေသော ကမ္ဘာ့ဂရင်းနစ်စံချိန်တင် မှတ်တမ်းစာအုပ်၌ “၁၉၅၃ ခုနှစ်၌ မြန်မာနိုင်ငံ ရန်ကုန်မြို့တွင် စာမျက်နှာ အရွက်ပေါင်း (၁၆၀၀၀) ရှိသော ဗုဒ္ဓစာပေ ကျမ်းဂန်များကို အလွတ်ကျက်မှတ် ရွတ်ဆိုနိုင်သော တွေ့ရခဲလှသည့် မှတ်ဉာဏ်ပိုင်ရှင် ပေါ်ထွက်လာခဲ့” ဟူ၍ မင်းကွန်းဆရာတော်၏ သူမတူ အံ့ချီးဖွယ် မှတ်ဉာဏ်ကောင်းပုံကို ရေးသားဖော်ပြခဲ့ကာ မင်းကွန်းဆရာတော်အား ကမ္ဘာ့မှတ်ဉာဏ်အကောင်းဆုံး ဂန္တဝင်ပုဂ္ဂိုလ်အဖြစ် မှတ်တမ်းတင် ဖော်ပြခဲ့ပါသည်။
ထို့အပြင် မြတ်စွာဘုရားရှင်သည် နယုန်လပြည့်နေ့၌ နတ်ဗြဟ္မာအပေါင်းအား မဟာသမယသုတ်ကို ဟောကြားတော်မူခဲ့ခြင်းကို အစွဲပြု၍ ထိုနေ့ကို “မဟာသမယအခါတော်နေ့”ဟူ၍လည်း သတ်မှတ်ခေါ်ဝေါ်ကြသည်။
ကိုးကားချက်။ ။ Maung Khine Zaw ရေးသားပြုစုပြီး“ရွှေ”စာပေတိုက်မှ ထုတ်ဝေသည့် “Myanmar Traditional Culture and Customs”၊ ရွှေစည်တော်စာပေမှ ပုံနှိပ်ထုတ်ဝေသည့် “မြန်မာ့ရိုးရာ ၁၂ လ ရာသီပွဲတော်များအကြောင်း”၊ ဒေါက်တာသန်းထိုက် （ရန်ကုန်တက္ကသိုလ်）စီစဉ်ပြီး ပြည့်ဝကျော်စာပေမှ ထုတ်ဝေသည့် “ဂုဏ်ထူးဆောင်”စံပြစာစီစာကုံး ပေါင်းချုပ်ကြီး၊ www.myanmar.gov.mm ဝက်ဘ်ဆိုက်စာမျက်နှာ
ဓာတ်ပုံများမှာ အင်တာနက်မှ ကူးယူဖော်ပြထားခြင်း ဖြစ်ပါသည်။
