ရေပက်ဖျန်းကစားခြင်း

ရေသည် သန့်ရှင်းစင်ကြယ်ခြင်း၊ အေးချမ်းခြင်းတို့ကို ကိုယ်စားပြုသောကြောင့် နှစ်သစ်ကူးကာလတွင် နှစ်ဟောင်းမှ အညစ်အကြေးများကို အတာရေဖြင့် ပက်ဖျန်းဆေးကြောသန့်စင်၍ စိတ်သစ်ကိုယ်သစ်ဖြင့် နှစ်သစ်ကို ကြိုဆိုသည့်သဘောဖြင့် တစ်ဦးနှင့်တစ်ဦး အတာရေများ ပက်ဖျန်းလေ့ရှိကြပါသည်။  နှစ်စဉ်နှစ်တိုင်း အတာသင်္ကြန်ပွဲတော် ကျရောက်ခါနီး အချိန်တွင် မြန်မာတစ်နိုင်ငံလုံးရှိ နေရာဒေသအသီးသီး၌ အကြီး၊ အလတ်၊ အသေး စသဖြင့် အရွယ်အစားမျိုးစုံသော ရေကစားမဏ္ဍပ်များ၊ အုန်းလက်မဏ္ဍပ်များ၊ လမ်းလျှောက်သင်္ကြန်ပွဲများနှင့် သင်္ကြန်ရေပက်ခံကားများကို စတင် ပြင်ဆင်နေကြပြီ ဖြစ်ပါသည်။ ငွေဖလားထဲတွင် အမွှေးနံ့သာရေများထည့်ကာ သပြေခက်ကလေးများဖြင့် ပက်ဖျန်းကြသလို ရေသေနတ်၊ ရေခွက်၊ ရေပိုက်များ၊ မီးသတ်ပိုက်များဖြင့်လည်း ရေပက်ဖျန်းလေ့ ရှိကြပါသည်။ မြို့ကြီးပြကြီးများသာမက ကျေးလက်တောရွာများ၊ လမ်းမကြီးများ၊ လမ်းကြိုလမ်းကြားများ၊ စင်ပေါ်စင်အောက်၊ ကားများနှင့် လမ်းသွားလမ်းလာများထိမကျန် အဆင့်အတန်း မရွေး၊ ဆင်းရဲချမ်းသာ မရွေး၊ ကျားမ မရွေး လူတိုင်းလူတိုင်း မည်သူမဆို အတာသင်္ကြန် ရေသဘင်ပွဲတော်ကို ဆင်နွှဲကာ အပြန်အလှန် နှစ်သစ်မင်္ဂလာ ဆုမွန်ကောင်းများ တောင်းပေးသည့် သဘောဖြင့် အချင်းချင်း အတာရေစင် ပက်ဖျန်းကြပါသည်။

သင်္ကြန်သီချင်းနှင့် သင်္ကြန်ရိုးရာယိမ်းအကအလှများ

သင်္ကြန်သီချင်းများနှင့် သင်္ကြန်ယိမ်းအက အလှများမှာလည်း မြန်မာ့အတာသင်္ကြန်ပွဲတော်၏ ထူးခြားချက်ပင် ဖြစ်သည်။ သင်္ကြန်သီချင်းများသည် သင်္ကြန်ကာလ၏ တမူထူးခြားချက်များကို ရေးဖွဲ့ကာ စပ်ဆိုထားခြင်း ဖြစ်သည်။ တစ်နှစ်မှာ တစ်ခါ၊ တစ်ခါမှာတစ်လ၊ တစ်လမှာမှ  သင်္ကြန်ကာလအတွင်းသာ ဖူးပွင့်သည့် သစ္စာရှိသော ပန်းပိတောက်များအကြောင်း၊ ချိုမြိန်သော သင်္ကြန်အချစ်ပုံပြင်များအကြောင်း၊ ချစ်သူခင်သူ အပေါင်းအသင်း မိတ်ဆွေများနှင့် ပျော်ပျော်ပါးပါး ရေကစားကြသော သင်္ကြန် အမှတ်တရများအကြောင်း၊ အတာရေသဘင်ပွဲတော်ကို ဆင်နွှဲကြသော သင်္ကြန်ပျိုမေများ၏ အလှတရားများအကြောင်း အစရှိသော အကြောင်းအရာများကို ရွှင်လန်းမြူးကြွသော ဂီတသံစဉ်များနှင့် ပေါင်းဖွဲ့စပ်ဆိုလိုက်သောအခါတွင် ပွဲတော်ရက် အငွေ့အသက် ပို၍ပင် တိုးပွားလို့ လာပေသည်။ ထို့အပြင် သင်္ကြန်ယိမ်းအဖွဲ့၏ ရှုမငြီးဖွယ်ရာ အကအလှများဖြင့် ထပ်လောင်းပေါင်းစပ်လိုက်သောအခါဝယ် နေရာတိုင်း၌ စည်ကားသိုက်မြိုက်သော ပွဲတော် အငွေ့အသက်များဖြင့် ပြည့်နှက်၍ နေလေတော့သည်။