နွေယဉ်စွန်းချိန် ကျရောက်သည့်နေ့တွင် နေ့တာအရှည်ဆုံးဖြစ်ပြီး နေလုံးအနေအထားသည် အမြင့်ဆုံးသို့ ရောက်ရှိနေသော်လည်း တစ်နှစ်တာလုံး၏ အပူပြင်းဆုံးသော အချိန်အခါ မဟုတ်ပေ။

နွေယဉ်စွန်းချိန်ရာသီတွင် တရုတ်နိုင်ငံ နေရာဒေသ အများစု၌ အပူရှိန် မြင့်မားနေပြီး နေရောင်ခြည် အလုံအလောက် ရရှိ၍ လယ်ယာစိုက်ပျိုးသီးနှံများ ဖြစ်ထွန်းအောင်မြင်ကာ ရေလိုအပ်မှုပမာဏ များစွာလိုအပ်လာပါသည်။ ဤရာသီချိန်တွင် လယ်ယာခင်း လုပ်ငန်းဆောင်တာ စီမံဆောင်ရွက်မှုများကို အဓိကထား လုပ်ဆောင်ရပြီး တစ်ချိန်တည်းမှာပင် နွေစိုက်သီးပင်များ စိုက်ပျိုးဆောင်ရွက်ခြင်းကို အချိန်မီ အပြီးသတ်ရန် လိုအပ်လှပေသည်။

“နွေယဉ်စွန်းချိန် ဝါစိုက်ခင်းတွင်၊ မြက်ရိုင်းနွယ်ပင် ခုတ်ထွင်ရှင်းလင်း၊ အချိန်မီစွာ မရှင်းပါက၊ မြွေဆိုးပမာ အန္တရာယ်ဒုက္ခပေး‌လေမှာ။” ဟူသော လယ်ခင်းဆိုရိုးစကားတစ်ခွန်း ရှိပါသည်။ ဤရာသီချိန်တွင် ရာသီဥတု စိုထိုင်း၍ မြက်ပင်ရိုင်းများသည်လည်း အလျင်အမြန် ပေါက်ရောက်ရှင်သန်တတ်သဖြင့် မြက်ပင်ရိုင်းများက လယ်ထွက်သီးပင်များနှင့်အပြိုင် အစာအာဟာရနှင့် ရေဓာတ်များ စုပ်ယူသွားခြင်းကို ကာကွယ်တားဆီးနိုင်ရန် လယ်သမားဦးကြီးများက မြက်ပင်ရိုင်းများအား အချိန်မီကြိုတင် သုတ်သင်ရှင်းလင်းရန် အရေးကြီးလှပေသည်။

ဟေးလုံကျန်းပြည်နယ်၊ မော့ဟဲမြို့အား “တရုတ်နိုင်ငံ၏ ညမရှိမြို့”၊ “ဝင်ရိုးစွန်းအလင်းတန်းမြို့တော်” ဟူ၍ အများက တင်စားခေါ်ဝေါ်ကြသည်။ အကြောင်းမှာ ဤဒေသသည် တရုတ်နိုင်ငံ၏ လတ္တီကျု အမြင့်ဆုံးမြို့ဖြစ်ပြီး လတ္တီကျု မြင့်မားသောကြောင့်လည်း အလွန်တရာ တွေ့ရခဲလှသော ဝင်ရိုးစွန်းအလင်းတန်း ဖြစ်စဉ်ကို နွေယဉ်စွန်းချိန်တွင် တွေ့မြင်နိုင်ကာ မကြာခဏဆိုသလိုပင် မြောက်ဝင်ရိုးစွန်းအလင်းတန်း (အော်ရိုရာအလင်းတန်း) ထွက်ပေါ်လေ့ ရှိပါသည်။ ထိုထူးခြားချက်ကြောင့်ပင် ယခုအခါ နွေယဉ်စွန်းချိန် ခရီးသွားရာသီပွဲတော်ကို မော့ဟဲမြို့၌ နှစ်စဉ်နှစ်တိုင်း ကျင်းပပြုလုပ်လေ့ ရှိပေသည်။

ယနေ့တွင် ကြည့်ရှုသူပရိသတ်များ အားလုံးအား တရုတ်နိုင်ငံအတွင်း နွေယဉ်စွန်းချိန်၏ ထွန်းလင်းသော ညတာအချိန်များကို သိမြင်ခံစားရန် အကောင်းဆုံးနေရာဖြစ်သည့် တရုတ်နိုင်ငံ၏ မြောက်ပိုင်းအကျဆုံး မော့ဟဲမြို့သို့ ဤဗီဒီယိုမှတစ်ဆင့် ခေါ်ဆောင်သွားပါရစေရှင်။

ဗီဒီယိုအား Xinhua သတင်းဌာန CNC အွန်လိုင်းတီဗီမှ ပံ့ပိုးတင်ဆက်ပေးထားခြင်း ဖြစ်ပါသည်။

ကိုးကားချက်။ ။ ဓာတုစက်မှုလုပ်ငန်း ပုံနှိပ်တိုက်မှ ထုတ်ဝေပြီး Qiu Bingjun မှ ရေးသားပြုစုသော “နှစ်ဆယ့်လေးခုသော တရုတ်ရိုးရာ ရာသီချိန်များ”၊ တရုတ်နိုင်ငံ ချစ်ကြည်ရေး ပုံနှိပ်ကုမ္ပဏီမှ ထုတ်ဝေသည့် “Yu Shicun ပြောသော နှစ်ဆယ့်လေးခုသော တရုတ်ရိုးရာ ရာသီချိန်များ”