“‌ဆီးနှင်းထန်ရာသီချိန်”တွင် အပူချိန် တဖြည်းဖြည်းကျဆင်းလာပြီး ဆီးနှင်းကျဆင်းမှုပမာဏသည်လည်း အဆက်မပြတ် တိုးပွားလာ၍ မြေပြင်ပေါ်၌ ဆီးနှင်းများ စတင်စုပုံလာပြီဖြစ်သည်။ အချို့သောနေရာများတွင် နှင်းများ သည်းသည်းထန်ထန် ကျဆင်းတတ်ပြီး နှင်းမုန်တိုင်းများပင် ဖြစ်ပေါ်တတ်သည်။ “‌ဆီးနှင်းထန်ရာသီချိန်”၏ အဓိပ္ပာယ်မှာ ရာသီဥတု ပိုမိုချမ်းအေးလာပြီး ဆီးနှင်းကျနိုင်ခြေ သို့မဟုတ် နေရာရပ်ဝန်း ပိုမိုတိုးပွားကျယ်ပြန့်လာကာ “ဆီးနှင်းပွင့်ကျရာသီချိန်” (‌ရှောင်ရွှယ်)ထက် နှင်းများ ပိုမိုစုပုံနေနိုင်သည်ကို ရည်ညွှန်းခြင်းဖြစ်သည်။ သို့သော် ကျိန်းသေပေါက် ဆီးနှင်းကျဆင်းမှုပမာဏ အလွန်များပြားမည်ကို ဆိုလိုခြင်းမဟုတ်ပေ။

ဤရာသီချိန်တွင် တရုတ်နိုင်ငံတောင်ပိုင်းနှင့် ယူနန်ပြည်နယ်တောင်ပိုင်း ဆောင်းရာသီကင်းမဲ့ဒေသများမှအပ တရုတ်ပြည် မြေတစ်ခွင်လုံးနီးပါးတွင် ဆောင်းရာသီအပြင်အဆင်များ လွှမ်းခြုံနေပေပြီ။ တရုတ်နိုင်ငံ အရှေ့မြောက်ပိုင်း၊ အနောက်မြောက်ပိုင်းဒေသများ၏ ပျမ်းမျှအပူချိန်မှာ ရေခဲမှတ်သုည‌အောက် ၁၀°အောက်သို့ ကျဆင်းနေပြီး မြစ်ဝါမြစ်ဝှမ်းနှင့် တရုတ်နိုင်ငံမြောက်ပိုင်းဒေသများ၏ အပူချိန်မှာ ရေခဲမှတ် ၀°အောက်တွင် ငြိမ်သက်လျက်ရှိနေပါသည်။ တရုတ်နိုင်ငံတောင်ပိုင်းဒေသများ အထူးသဖြင့် ကွမ်ကျိုး(Guangzhou)မြို့နှင့် ပုလဲမြစ်ဝကျွမ်းပေါ်ဒေသတစ်လျှောက်သည် တရုတ်နိုင်ငံ မြောက်ပိုင်းရာသီဥတုနှင့် သိသိသာသာ ကွာဟပါသည်။ တောင်ပိုင်းဒေသ၏ ဆောင်းရာသီမှာ နွေးထွေးပြီး မိုး၊ဆီးနှင်းများနည်းပါးကာ ရံဖန်ရံခါ နှင်းကျတတ်ပါသည်။ ဤရာသီချိန်တွင် တရုတ်နိုင်ငံတောင်ပိုင်း‌ဒေသများ၏ ရာသီဥတုထူးခြားချက်မှာ မြူထူထပ်ခြင်းဖြစ်သည်။

ဆောင်းလယ်လအချိန်အခါသို့ ရောက်ရှိသောအခါ ဟေးလုံကျန်း (Heilongjiang)ပြည်နယ်၊ ဟိုင်လင် (Hailin)မြို့ စွမ်းဖုန်း(Shuangfeng) သစ်တောခင်းပြင်ရှိ နှင်းဖြူလွင်လွင်တွင် သစ်ခုတ်သမားများက ဒဏ္ဍာရီလာကမ္ဘာလေးကို တက်ညီလက်ညီ ဖန်တီးတည်ဆောက်နေကြပါသည်။ နှင်းပွင့်တလူလူ လွင့်ပျံကျဆင်းနေသည့် ရာသီချိန်တွင် ကျွန်မတို့အားလုံး ဤဗီဒီယိုမှတစ်ဆင့် ဒဏ္ဍာရီပုံပြင်ထဲမှ နှင်းတို့၏ဌာနေကို ကြည့်ရှုခံစားလိုက်ရအောင်လားရှင့်။