“တဟန် (Da Han)” ရာသီချိန်သည် သတ်မှတ်ချက် သဘောတရားအရဆိုလျှင် တစ်နှစ်တာလုံး၏ အချမ်းအေးဆုံးသော ရာသီချိန် ဖြစ်ပါသည်။ ဤကာလတွင် နေဝန်းကြီးသည် လောင်ဂျီကျု ၃၀၀° သို့ လည်ပတ်ကျရောက်နေပြီး ပုံမှန်အားဖြင့် ဇန်နဝါရီလ (၂၀)ရက်နေ့ သို့မဟုတ် (၂၁)ရက်နေ့တွင် ကျရောက်လေ့ရှိကာ တရုတ်ရိုးရာ ရာသီချိန် (၂၄)ခုအနက်မှ နောက်ဆုံးရာသီချိန် ဖြစ်ပါသည်။ ဤသည်မှာလည်း နှစ်သစ်တစ်နှစ်၏ ရာသီချိန်စက်ဝန်း တစ်ဖန်ပြန်၍ လည်ပတ်ရန် ကြိုဆိုခြင်းသဘော ဖြစ်ပါသည်။ “တဟန် (Da Han)” ရာသီချိန်သည်လည်း “ရှောင်ဟန် (Xiao Han)” ရာသီချိန်ကဲ့သို့ပင် အပူချိန် အနွေးအအေး အခြေအနေကို ထင်ဟပ်ဖော်ပြသော ရာသီချိန်ဖြစ်ပြီး တစ်နှစ်တာကာလပတ်လုံးတွင် မိုးရေချိန်ရရှိမှု အနည်းဆုံး အချိန်ကာလပင် ဖြစ်သည်။

“တဟန် (Da Han)” ရာသီချိန်မှ “နွေဦးသစ်စရာသီချိန်”အထိ အချိန်ကာလအတွင်းတွင် အရေးပါသော ရိုးရာထုံးတမ်းဓလေ့နှင့် ပွဲတော်ရက်များစွာ ရှိပါသည်။ ဥပမာအားဖြင့် မီးဖိုနတ်အား ပူဇော်ကန်တော့ခြင်း၊ နှစ်သစ်ကူးအကြိုကာလ၊ နှစ်သစ်ကူးအကြိုနေ့ကျင်းပခြင်းများ အစရှိသည်တို့ဖြစ်သည်။ တစ်ခါတစ်ရံတွင် တရုတ်နိုင်ငံ၏ အကြီးကျယ်ဆုံးသော နွေဦးပွဲတော် (ခေါ်) တရုတ်နှစ်သစ်ကူးပွဲတော်ပင်လျှင် ဤရာသီချိန်ကာလအတွင်း၌ ကျရောက်လေ့ရှိပါသည်။