Guangzhou Wondfo Biotech Co., Ltd က မြန်မာနိုင်ငံ ကျန်းမာရေးနှင့်အားကစား ဝန်ကြီးဌာနသို့ လှူဒါန်းပေးအပ်သော COVID-19 Antibody Test (Lateral Flow Method) အစုံ ၁၂၀၀ လွှဲပြောင်းပေးအပ်ခြင်းအခမ်းအနားကို ဧပြီလ ၂၉ ရက်နေ့တွင် ရန်ကုန်မြို့၌ ကျင်းပခဲ့ပါသည်။ အဆိုပါအခမ်းအနားသို့ မြန်မာနိုင်ငံဆိုင်ရာတရုတ်သံရုံးမှ သံမှူးကြီး Ms. Li Xiaoyan ၊ မြန်မာနိုင်ငံ ကျန်းမာရေးနှင့်အားကစားဝန်ကြီးဌာန ဆေးသုတေသနဦးစီးဌာန ပါမောက္ခဒေါက်တာဇော်သန်းထွန်း၊ မြန်မာနိုင်ငံ နေအုပ်ဖောင်ဒေးရှင်း ဥက္ကဋ္ဌ ဦးနေအုပ်တို့ တက်ရောက်ခဲ့ကြပါသည်။ သံမှူးကြီး Ms. Li Xiaoyan က Guangzhou Wondfo Biotech Co., Ltd ကိုယ်စား မြန်မာဘက်သို့ အဆိုပါပစ္စည်းများအား လွှဲပြောင်းပေးအပ်ပြီး ကျေးဇူးတင်ဂုဏ်ပြုမှတ်တမ်းလွှာကို လက်ခံရရှိခဲ့ပါသည်။

ထိုနေ့တွင်ပင် China Forestry Group Myanmar Co., Ltd က မြန်မာနိုင်ငံ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနသို့ COVID-19 ရောဂါ ကာကွယ်ရေးဆိုင်ရာ လှူဒါန်းငွေ အမေရိကန်ဒေါ်လာ ၈၀၀၀ ပေးအပ်ခြင်းအခမ်းအနားကို ရန်ကုန်မြို့၌ ကျင်းပခဲ့ပါသည်။ အဆိုပါအခမ်းအနားသို့ မြန်မာနိုင်ငံဆိုင်ရာတရုတ်သံရုံးမှ စီးပွားရေးသံမှူး Mr. Tan Shufu ၊ မြန်မာ့သစ်လုပ်ငန်း အထွေထွေမန်နေဂျာ ဦးစောဂျွန်ရွေဘ၊ ရန်ကုန်တိုင်းသစ်တောဦးစီးဌာန ညွှန်ကြားရေးမှူးချုပ် ဦးသိန်းတိုး၊ China Forestry Group Myanmar Co., Ltd မြန်မာရုံးခွဲ စီမံကိန်းညှိနှိုင်းသူ Mr. Chen Mingkui တို့ တက်ရောက်ခဲ့ကြပါသည်။ ဦးစောဂျွန်ရွေဘက မြန်မာနိုင်ငံ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန ကိုယ်စား လှူဒါန်းငွေ လက်ခံရယူပြီး ကျေးဇူးတင်ဂုဏ်ပြုမှတ်တမ်းလွှာကို ပြန်လည်ပေးအပ်ခဲ့ပါသည်။

တရုတ်ယူနန် Union Resources & Engineering Company Limited (UREC) က ရန်ကုန်တိုင်း ဒေသကြီးသို့ လှူဒါန်းပေးအပ်သော ဆေးဝါး၊ တစ်ကိုယ်ရေသုံးရောဂါကာကွယ်ရေးဝတ်စုံ (PPE) စသည့် ရောဂါကာကွယ်ရေးပစ္စည်းများ လွှဲပြောင်းပေးအပ်ခြင်းအခမ်းအနားကို ဧပြီလ ၃၀ ရက်နေ့တွင် ရန်ကုန်တိုင်းဒေသကြီးအစိုးရအဖွဲ့၌ ကျင်းပခဲ့ပါသည်။ အဆိုပါအခမ်းအနားသို့ မြန်မာနိုင်ငံဆိုင်ရာ တရုတ်သံရုံးမှ သံမှူးကြီး Ms. Li Xiaoyan ၊ ရန်ကုန်တိုင်းဒေသကြီးအစိုးရအဖွဲ့ ဝန်ကြီးချုပ် ဦးဖြိုးမင်းသိန်း၊ UREC ရန်ကုန်ရုံးခွဲတာဝန်ရှိပုဂ္ဂိုလ် Mr. Liu Zhihong တို့ တက်ရောက်ခဲ့ကြပါသည်။ ဝန်ကြီးချုပ် ဦးဖြိုးမင်းသိန်းက ရန်ကုန်တိုင်းဒေသကြီးအစိုးရအဖွဲ့ကိုယ်စား လှူဒါန်းသောပစ္စည်းများကို လက်ခံပြီး ကုမ္ပဏီထံ ကျေးဇူးတင်ဂုဏ်ပြုမှတ်တမ်းလွှာကို ပြန်လည်ပေးအပ်ခဲ့ပါသည်။

လတ်တလောတွင် Gree Group ၊ Jiangxi Chamber of Commerce in Myanmar တို့က ရန်ကုန် မြို့ရှိ အသွားအလာကန့်သတ်၍ စောင့်ကြပ်ကြည့်ရှုသည့်ဆေးရုံများ၊ လှိုင်သာယာမြို့နယ်စသည်တို့ကို လေအေးပေးစက်၊ နှာခေါင်းစည်း၊ ပိုးသတ်ဆေးရည်စသည့် ပစ္စည်းများကို သီးခြားစီလှူဒါန်းပေးအပ် သဖြင့် မြန်မာနိုင်ငံနယ်ပယ်အသီးသီး၏ ချီးကျုးမှုကိုခံခဲ့ရပါသည်