မေလ ၅ရက်နေ့၌ မြန်မာနိုင်ငံဆိုင်ရာ တရုတ်သံအမတ်ကြီး Ms.Ma Jia က "အပြန်အလှန်ဖေးမကူညီကြသည့် ဆွေမျိုးပေါက်ဖော်ချစ်ကြည်ရေး ချစ်ခင်ရင်းနှီးမှု၊ ရိုးသားမှု၊ အပြန်အလှန်အကျိုးရှိမှု၊ အားလုံးပါဝင်မှု၏စာမျက်နှာသစ်" ဟူသော ခေါင်းစဉ်ဖြင့် ကိုယ်တိုင်ရေးသားထားသည့်ဆောင်းပါးကို မြန်မာနိုင်ငံ၏ တရားဝင် မီဒီယာများဖြစ်သည့်« The Global New Light of Myanmar» «ကြေးမုံ» «မြန်မာ့အလင်း»တို့တွင် ထုတ်ပြန်ခဲ့သည်။ ဆောင်းပါးတွင် မြန်မာနိုင်ငံ၌ ရုတ်တရက်ငလျင်လှုပ်ခတ်ပြီးနောက်  တရုတ်နိုင်ငံသည်ဖေးမကူညီသောလက်ကို အမြန်ဆုံးကမ်းလှမ်းခဲ့ကြောင်း၊ ငလျင်ကယ်ဆယ်ရေးတွင် တတ်စွမ်းသမျှကူညီခဲ့၍ ငလျင်လွန်ကာလ ပြန်လည်ထူထောင်ရေး၊ ကူးစက်ရောဂါကာကွယ်ရေးနှင့် ထိန်းချုပ်ရေး လုပ်ငန်းတို့တွင် တက်ကြွစွာပါဝင်ခဲ့ကြောင်း၊ အဆိုပါလုပ်ငန်းစဉ်အတွင်း မြန်မာပြည်သူများ၏ အလျှော့မပေးသော ရဲရင့်မှု၊ အကောင်းမြင်စိတ်နှင့် ကြံ့ခိုင်မှုတို့ကိုလည်း ပြသခဲ့ကြောင်း၊ ငလျင်သည် ကမ္ဘာမြေကြီးကိုအက်ကွဲစေခဲ့သော်လည်း တရုတ်-မြန်မာ ဆွေမျိုးပေါက်ဖော် ချစ်ကြည်ရေးကို ဖြတ်တောက်၍မရသလို ကံကြမ္မာတူဖေးမကူသောစိတ်ဓာတ်နှင့် ယုံကြည်မှုကိုလည်းမလှုပ်ခပ်နိုင်ကြောင်း ကျွန်မတို့ အခိုင်အမာ ယုံကြည်ပါသည်။ တရုတ်-မြန်မာ ချစ်ကြည်ရေးသည် နှစ်ပေါင်း ၂၀၀၀ ကျော် တည်တံ့ခိုင်မြဲခဲ့ခြင်းသည် ဆွေမျိုးပေါက်ဖော်ချစ်ကြည်ရေးကို ဆက်လက်ပြီး လက်ဆင့်ကမ်းရုံသာမက ချစ်ခင်ရင်းနှီးမှု၊ ရိုးသားမှု၊ အပြန်အလှန်အကျိုးရှိမှု၊ အားလုံးပါဝင်မှုဟူသော သဘောတရားကိုလည်း ဖော်ညွှန်းနေပါကြောင်း၊ ဧပြီလ အစောပိုင်းတွင်ကျင်းပသည့် တရုတ်နိုင်ငံ၏ အိမ်နီးချင်းနိုင်ငံများနှင့်ပတ်သက်သည့် လုပ်ငန်းဆိုင်ရာဗဟိုညီလာခံ （The Central Conference on Work Related to Neighboring Countries）တွင် အိမ်နီးချင်းနိုင်ငံများနှင့်အေးအတူပူအမျှ အသိုက်အဝန်း တည်ဆောက်ခြင်းကို အာရုံစိုက်ကြရမည်ဖြစ်ကြောင်း ကို အလေးပေးပြောကြားခဲ့ကြောင်း၊ တရုတ်နိုင်ငံသည် မြန်မာလူမျိုးများ ပုံမှန်လူနေမှုဘဝနှင့်ထုတ်လုပ်ရေးလုပ်ငန်းများ အမြန်ဆုံးပြန်လည်စတင်နိုင်ရန် တရုတ်နိုင်ငံက ဆက်လက်ကူညီသွားမည်ဖြစ်ကြောင်း၊ ယခုနှစ် တရုတ်-မြန်မာ သံတမန်ဆက်ဆံရေး ထူထောင်ခြင်း ၇၅ နှစ်မြောက် နှစ်ပတ်လည်နေ့ကို ဂုဏ်ပြုသည့်အနေဖြင့် တရုတ်နိုင်ငံသည် နှစ်နိုင်ငံ ဆက်ဆံရေး ပိုမိုဖွံ့ဖြိုးတိုးတက်လာစေရန်နှင့် ခေတ်သစ်တွင် မျှဝေခံစားသည့် အနာဂတ်နှင့်အတူ တရုတ်-မြန်မာ အသိုက်အဝန်း ရေရှည်တည်တံ့ခိုင်မြဲရေး တည်ဆောက်ရေးကို တွန်းအားပေးဆောင်ရွက်သွားမည်ဖြစ်ကြောင်းကို အဆိုပါဆောင်းပါးတွင် ဖော်ပြထားသည်။ 

ဆောင်းပါးအပြည့်အစုံမှာ အောက်ပါအတိုင်းဖြစ်သည်။

၂၀၂၅ ခုနှစ်၊ မတ်လ ၂၈ ရက်နေ့တွင် မြန်မာနိုင်ငံ၌ ရာစုနှစ်တစ်ခုနီးပါးအတွင်း မကြုံစဖူးဖြစ်ပွားခဲ့သော ငလျင်ကြီးတစ်ခု လှုပ်ခတ်ခဲ့သည်။ ထိုအချိန်တွင် ကျွန်မသည် ပေကျင်းရောက်နေသည့်အတွက် ငလျင်သတင်းကိုကြားသိရချိန် လွန်စွာစိုးရိမ်ပူပန်နေပြီး  ဒုတိယနေ့တွင်ပင် တရုတ်ကယ်ဆယ်ရေးအဖွဲ့များနှင့်အတူ မြန်မာနိုင်ငံကို ပြန်လာခဲ့ပြီး ငလျင် ကယ်ဆယ်ရေးလုပ်ငန်းတွင်ပါဝင်ခဲ့သည်။ ထို့နောက် ကျွန်မသည် ကယ်ဆယ်ရေး၊ ထောက်ပံ့ပစ္စည်းများ၊ ဆေးဝါးကုသရေး၊ ကူးစက်ရောဂါကာကွယ်ရေးနှင့် ထိန်းချုပ်ရေးဆိုင်ရာ လိုအပ်ချက်များကို သိရှိရန်အတွက် ငလျင်ဒဏ်သင့်ဒေသသို့ သွားရောက်ကြည့်ရှုခဲ့ပါသည်။ လမ်းမကြီးသည် ကွဲအက်ပြီး အက်ကြောင်းကြီးများအဖြစ် လည်းကောင်း၊ အိမ်များပြိုကျပျက်စီးပြီး အုတ်ကျိုးများအဖြစ်သို့လည်းကောင်း၊ မျက်စိတစ်မှိတ်အတွင်း အိမ်များ၊ ကျောင်းဝင်းများနှင့် ပန်းခြံများ ယိုယွင်းပျက်စီးသွားသည်။ ပြင်းထန်သော ကပ်ဘေးသည် ကျွန်မနှင့် တရုတ်သံရုံးရှိကျွန်မ၏လုပ်ဖော်ကိုင်ဖက်များ၊ တရုတ်ပြည်သူပြည်သား ၁.၄ ဘီလီယံ တို့၏စိတ်နှလုံးကိုထိမိသွားစေသည်။ ငလျင်ဒဏ်သင့်ပြည်သူများအတွက် ကျွန်မတို့ စိတ်ရင်းမှန်ဖြင့် ဆုတောင်းပြီး တစ်ချိန်တည်းမှာပင် အရင်းအမြစ်များနှင့် နည်းလမ်းအားလုံးကို အသုံးချပြီး ငလျင်ဒဏ်သင့်ဒေသများကို ကူညီမှုနှင့်ထောက်ပံ့မှုများပေးအပ်ခဲ့ပါသည်။

သဘာဝဘေးအန္တရာယ်သည် အကြင်နာတရား ကင်းမဲ့သော်လည်း ပြည်သူများက မေတ္တာတရားရှိခြင်းသည် တရုတ်မြန်မာနှစ်နိုင်ငံ သာအတူနာအတူနှင့် အပြန်အလှန် ဖေးမကူညီခြင်း၌ ထင်ဟပ်ပေါ်လွင်စေသည်။ မြန်မာနိုင်ငံ၏ ခင်မင်ရင်းနှီးသော အိမ်နီးချင်းနှင့် ဆွေမျိုးပေါက်ဖော်အနေဖြင့် တရုတ်နိုင်ငံသည် ငလျင်လှုပ်ခတ်ပြီးနောက် ချက်ချင်းဆိုသလို ဖေးမကူညီသောလက်ကို ကမ်းလှမ်းခဲ့သည်။ တရုတ်ပြည်သူ့သမ္မတနိုင်ငံ သမ္မတ ရှီကျင့်ဖျင် နှင့် ဝန်ကြီးချုပ် H.E. Mr. Li Qiang တို့က မြန်မာနိုင်ငံအကြီးအကဲ ဗိုလ်ချုပ်မှူးကြီး မင်းအောင်လှိုင်ထံ ဝမ်းနည်းကြောင်း သဝဏ်လွှာပေးပို့ခဲ့ပြီး၊ ငလျင်ဒဏ်ကြောင့် သေဆုံးခဲ့ရသူများအတွက်  ဝမ်းနည်းစိတ်မကောင်းဖြစ်မိပါကြောင်းနှင့် ငလျင်ကြောင့် ထိခိုက်ဒဏ်ရာရရှိသူများ၊ ၎င်းတို့၏ မိသားစုဝင်များအတွက် စာနာထောက်ထားပါကြောင်း၊ တရုတ်နိုင်ငံအနေဖြင့် မြန်မာနိုင်ငံအတွက် လိုအပ်သည့်အကူအညီများပေးရန် ဆန္ဒရှိကြောင်းနှင့် ထိခိုက်ခံစားရသည့်မြန်မာပြည်သူများ ဘေးဒဏ်အန္တရာယ် ကျော်လွှားနိုင်ရေးနှင့် မိမိတို့အနေဖြင့် မြန်မာနိုင်ငံကိုအမြန်ဆုံး ပြန်လည်တည်ဆောက်ရေးအကူအညီများ ထောက်ပံ့ပေးသွားမည် ဖြစ်ကြောင်း ပြောကြားခဲ့ပါသည်။ တရုတ်နိုင်ငံအစိုးရက မြန်မာနိုင်ငံ အရေးပေါ်ကယ်ဆယ်ရေး၊ ကပ်ရောဂါကာကွယ်ထိန်းချုပ်ရေးနှင့် ပြန်လည်တည်ဆောက်ရေး လုပ်ငန်းများအတွက် အရေးပေါ် လူသားချင်းစာနာထောက်ထားမှု ယွမ် ၁.၁ ဘီလီယံထောက်ပံ့ပေးသွားမည်ဟု ကြေညာလိုက်ပါသည်။ တရုတ်နိုင်ငံ အစိုးရကယ်ဆယ်ရေးအဖွဲ့ (၄) ဖွဲ့နှင့် အရပ်ဘက်ကယ်ဆယ်ရေးအဖွဲ့ (၃၀) နီးပါးမှ အဖွဲ့ဝင်ပေါင်း ၆၀၀ ကျော်သည် ဒဏ်သင့်ဒေသသို့ ညတွင်းချင်း သွားရောက်ကြပြီး အသက်ရှင်ကျန်ရစ်သူများကို မရပ်မနား ရှာဖွေကယ်တင်နိုင်ခဲ့ကြသည်။ တစ်ချိန်တည်း၌ပင် အရေးပေါ်လူသားချင်း စာနာထောက်ထားမှုဆိုင်ရာ ငလျင်ကယ်ဆယ်ရေးပစ္စည်း(၉)ကြိမ် ပို့ဆောင်ပေးခဲ့ကာ  ရွက်ဖျင်တဲ ၃၉၄၀ ခု၊ စောင် ၁၀၀၀၀ ထည်၊ ခြင်ထောင် ၄၀၀၀၀ ခု၊ တာပေါ်လင် ၁၈၀၀၀ ချပ်၊ အရေးပေါ်ဆေးအိတ် ၅၅၀၀၀ ထုတ်၊ ရေသန့်စင်စက် ၁၀၄၈ စုံ၊ အသင့်စားအစားအစာ ၇၀၀၀ ဖာ၊ မီးဖိုချောင်သုံးပစ္စည်း အစုံ ၂၀၀၀၊ နေရောင်ခြည်စွမ်းအင်သုံး မီးလုံး ၁၀၀၀၀ ခု၊ နေ့စဉ်သုံးသန့်စင်ပစ္စည်းများ ၄၀၀၀၀ စုံ အပြင် ကာလဝမ်းရောဂါကာကွယ်ဆေးထောင့် ၆၄၈၀၀၀နှင့် မေးခိုင်ကာကွယ်ထိုးဆေး ၆၈၀၀၀ ၊ ဆေးဝါးဗူးပေါင်း ၃.၁၁၇ သန်း၊ နှင့် ဆေးဘက်သုံးပစ္စည်းနှင့်စက်ကိရိယာ ၁၆၃၀၀၀ စသည်တို့ပါဝင်ပါသည်။ တရုတ်နိုင်ငံမှ ဆေးဘက်ဆိုင်ရာဝန်ထမ်းများသည် ကယ်ဆယ်ရေးအဖွဲ့နှင့်အတူ ကပ်ဘေးဒေသတွင် ဆေးဝါးကုသမှုနှင့် ကပ်ရောဂါကာကွယ်ထိန်းချုပ်မှုများကို ဆောင်ရွက်ပေးခဲ့ပါသည်။ ကူးစက်ရောဂါ ကာကွယ်ရေးနှင့် ငလျင်ဘေးဒဏ်ကြောင့် ထိခိုက်ပျက်စီးမှုအခြေအနေ စုံစမ်းစစ်ဆေးရေးနှင့် အကဲဖြတ်ရေးကျွမ်းကျင်ပညာရှင်အဖွဲ့ များသည် ဘေးသင့်ဒေသများသို့ သွားရောက်၍ ၎င်းတို့သက်ဆိုင်ရာလုပ်ငန်းများကို ဆောင်ရွက်နေကြသည်။ တရုတ်ကုမ္ပဏီများ၊ အဖွဲ့အစည်းများ၊ အရပ်ဘက်အဖွဲ့အစည်းများ နှင့် အလွှာပေါင်းစုံမှပြည်သူများသည် ငွေကြေးနှင့်ပစ္စည်းများကို စိတ်အားထက်သန်စွာ လှူဒါန်းကြပြီး စေတနာအလျောက် ဝန်ဆောင်မှုများ ပေးနေကြသည်။ တရုတ်မီဒီယာများကဘေးသင့်ဒေသသို့သွားရောက်ပြီး မြေပြင်အခြေအနေသတင်းများ တင်ဆက်ကာ ငလျင်ဘေးကယ်ဆယ်ရေးတွင် ဘက်အသီးသီးအားလုံး ပူးပေါင်းပါဝင်ရန် တိုက်တွန်းခဲ့ကြသည်။ တရုတ်နိုင်ငံသည် ပထမဆုံး အကူအညီပေးရန် ကြေညာသော၊ ပထမဆုံးကယ်ဆယ်ရေးအဖွဲ့စေလွှတ်သော၊ ပထမဆုံးယာယီအခြေချစခန်း တည်ဆောက်သော နိုင်ငံဖြစ်သည့်အပြင် ကယ်ဆယ်ရေးအဖွဲ့နှင့် လူအင်အား အများဆုံးစေလွှတ်သော၊ အသက်ရှင်ကျန်ရစ်သူ အများဆုံးကိုကယ်တင်နိုင်သော၊ ထောက်ပံ့ကူညီမှု အများဆုံး ပေးအပ်ခဲ့သော နိုင်ငံလည်းဖြစ်ပါသည်။ 

သဘာဝဘေးအန္တရာယ်သည် အကြင်နာတရား ကင်းမဲ့သော်လည်း ပြည်သူများက မေတ္တာတရားရှိခြင်းသည် မြန်မာပြည်သူများ၏ ဇွဲ လုံ့လ ဝရိယနှင့်စိတ်ဓာတ်ကြံ့ခိုင်ခြင်း ကို ထင်ဟပ်ပေါ်လွင်စေသည်။ ငလျင်လှုပ်ခတ်ခဲ့ပြီး တစ်လကျော်သွားချိန်မှာ ထိခိုက်ဒဏ်ရာရသူတွေအတွက်ကတော့ နာကျင်မှုကို ဆက်လက်ခံစားနေကြရသော်လည်း မြန်မာလူမျိုးတွေရဲ့ ရဲစွမ်းသတ္တိ၊ အကောင်းမြင်စိတ်နဲ့ စိတ်ဓာတ်ကြံ့ခိုင်မှုတွေက အနာဂတ်အတွက် မျှော်လင့်ချက်တွေ ထွန်းညှိပေးပြီး လူသားတွေရဲ့ ထက်မြက်မှုကလည်း ကျွန်မတို့အားလုံးရဲ့နှလုံးသားကို ကျေနပ်ပီတိဖြစ်စေခဲ့ပါသည်။ ငလျင်ဒဏ်သင့်ဒေသများရှိ ပြည်သူများသည် ဝမ်းနည်းပူဆွေးမှုများနှင့် ပြည့်နှက်နေသော်လည်း အပြန်အလှန် ကူညီကယ်ဆယ်ရေးကို တက်ကြွစွာကြိုးစားနေကြဆဲဖြစ်သည်။ ဆရာ၊ ဆရာမများသည် မိမိလုံခြုံ‌ရေးကို အရေးမထားဘဲ အန္တရာယ်ရှိသော နေရာသို့ပြန်သွားပြီး ကျောင်းသားများကိုစည်းရုံးကာ ဘေးလွတ်ရာသို့ ရွှေ့ပြောင်းပေးခဲ့သည်။ ပရဟိတအဖွဲ့အစည်းများနှင့် အလွှာပေါင်းစုံမှ ပြည်သူများက အမြန်ဆုံးလှုပ်ရှားကြကာ အလှူရှင်များက အလှူငွေထည့်ခြင်းဖြင့်၊ ခွန်အားရှိသူများက လူအင်အားဖြင့် ဝိုင်းဝန်းကူညီခဲ့ကြပါသည်။ ဒေသခံပြည်သူများက အအေး၊ ဖရဲသီးနှင့် အစားအစာများကို နိုင်ငံတကာ ကယ်ဆယ်ရေးအဖွဲ့ဝင်များထံ ယူဆောင်လာပြီး အပူဒဏ်သက်သာစေရန်နှင့် ခြင်ကိုက်ဒဏ်ကာကွယ်ရန်အတွက် သနပ်ခါးများကို လိမ်းပေးခဲ့သည်။ အဆိုပါမြင်ကွင်းများသည် မြန်မာလူမျိုးတို့၏ ရဲရင့်မှု၊ စိတ်သဘောထားကောင်းမှုနှင့် စည်းလုံးမှုကို ပြသနေပါသည်။ စိတ်ဓာတ်ကြံ့ခိုင်မှုရှိသော မြန်မာလူမျိုးများသည် အတိုဆုံးအချိန်အတွင်း မိမိတို့၏နေရပ်ဌာနများကို ပြန်လည်တည်ဆောက်နိုင်မည်ဖြစ်ပြီး ရွှေမြန်မာပြည်သည် ပို၍ပင် ကြီးကျယ်ခမ်းနား၊ ထွန်းလင်းတောက်ပသွားမည်မှာ ဧကန်မုချရကြောင်းကို ကျွန်မအကြွင်းမဲ့ ယုံကြည်ပါသည်။

သဘာဝဘေးအန္တရာယ်သည် အကြင်နာတရား ကင်းမဲ့သော်လည်း ပြည်သူများက မေတ္တာတရားရှိခြင်းသည် တရုတ်မြန်မာအေးအတူပူအမျှအသိုက်အဝန်းတည်ဆောက်ရေး လက်တွေ့ဖော်ဆောင်မှုတွင်ထင်ဟပ်ပေါ်လွင်စေသည်။ တရုတ်-မြန်မာ ချစ်ကြည်ရေးသည် နှစ်ပေါင်း ၂၀၀၀ ကျော် တည်တံ့ခိုင်မြဲခဲ့သည်။ သမိုင်းတွင် မကြာခဏ ဖလှယ်မှုများမှသည် ငြိမ်းချမ်းစွာအတူယှဉ်တွဲနေထိုင်ရေးမူကြီး (၅) ရပ်ကို အတူတကွအဆိုပြုခဲ့ခြင်းနှင့် တရုတ်-မြန်မာအေးအတူပူအမျှအသိုက်အဝန်း တည်ဆောက်ခြင်း အထိ ခင်မင်ရင်းနှီးမှုကို ထာဝစဉ်  လက်ဆင့်ကမ်းသွားရုံသာမက ချစ်ခင်ရင်းနှီးမှု၊ ရိုးသားမှု၊ အပြန်အလှန်အကျိုးရှိမှု၊ အားလုံးပါဝင်မှုဟူသော သဘောတရားကိုလည်း ဖော်ဆောင်နေပါသည်။

သွေးချင်းသားချင်းလိုချစ်ခင်ရင်းနှီးခြင်း။ တရုတ်-မြန်မာနှစ်နိုင်ငံသည် ပထဝီဝင်အနေအထားအရနီးကပ်ခြင်း၊ ယဉ်ကျေးမှုအရတူညီကြခြင်း၊ ဘုရားတရားကံကြမ္မာ အရသွယ်ဆက်နေကြသည်။ ဧရာဝတီမြစ်သည် တရုတ်နိုင်ငံမှ မြစ်ဖျားခံပြီး နှစ်နိုင်ငံပြည်သူများသည် တစ်မြစ်တွင်းရေ အတူသောက်သုံးကြကာ ရှေးယခင်ကတည်းက ချစ်ကြည်ရင်းနှီးစွာ ကူးလူးဆက်ဆံခဲ့ကြပါသည်။ မြန်မာပြည်သူများသည် မြန်မာဘာသာစကားမှာ သွေးချင်းညီအစ်ကိုဟုအဓိပ္ပါယ်ရသော “ပေါက်ဖော်” ဟူသော စကားလုံးဖြင့် တရုတ်ပြည်သူများကိုရည်ညွှန်းပြီး ခေါ်တွင်ကြသည်။ လက်ရှိခေတ်ကာလတွင် နှစ်နိုင်ငံသည် ကိုလိုနီစနစ်(Colonialism) နှင့် နယ်ချဲ့ဝါဒ(Imperialism) ကို တော်လှန်ရန် လက်တွဲခဲ့ကြသည်။ မြန်မာနိုင်ငံသည် ကွဲပြားခြားနားသော လူမှုရေးစနစ်ရှိသည့် နိုင်ငံများအနက် တရုတ်ပြည်သူ့သမ္မတနိုင်ငံကို အသိအမှတ်ပြုခဲ့သည့် ပထမဆုံးနိုင်ငံ ဖြစ်သည်။ တရုတ်နိုင်ငံဝန်ကြီးချုပ် ချူအင်းလိုင်း နှင့် မြန်မာနိုင်ငံဝန်ကြီးချုပ် ဦးနုတို့ ကိုယ်စားပြုသည့် နှစ်နိုင်ငံ မျိုးဆက်ဟောင်း ခေါင်းဆောင်များ မကြာခဏလာ‌ရောက်ကြသည့် တရားဝင်ခရီးစဉ်များသည် နှစ်နိုင်ငံကြား အပြန်အလှန် ဖလှယ်မှု သမိုင်းတွင် ချီးမွမ်းခံရသော အမှတ်ရမှုများဖြစ်လာခဲ့ပြီး ကမ္ဘာတဝှမ်းရှိ အိမ်နီးချင်းနိုင်ငံများကြား အပြန်အလှန်ဖလှယ်မှုတွင်လည်း ကောင်းချီးရွှေခွန်း ခေါ်ခံခဲ့ရပါသည်။၂၀၂၀ ပြည့်နှစ်တွင် တရုတ်သမ္မတရှီကျင့်ဖျင် သည် မြန်မာနိုင်ငံသို့ သမိုင်းဝင်ခရီးစဥ်အဖြစ်လာ‌ရောက်ခဲ့ခြင်းမှ တရုတ်-မြန်မာ အေးအတူပူအမျှအသိုက်အဝန်း ပူးပေါင်းတည်ဆောက်မည့် ခေတ်သစ်ကို အစပြုပေးခဲ့သည်။

နှလုံးသားဖြင့်ရိုးသားစွာဆက်ဆံခြင်း။ သံတမန်ဆက်ဆံရေးထူထောင်ခြင်း ၇၅ နှစ် အတွင်း တရုတ်-မြန်မာ နှစ်နိုင်ငံသည် အပြန်အလှန် ယုံကြည်မှု၊ လေးစားမှုနှင့် ပံ့ပိုးမှုများကို အစဉ်အမြဲထိန်းသိမ်းခဲ့ကြသည်။ ငြိမ်းချမ်းစွာအတူယှဉ်တွဲနေထိုင်ရေးမူကြီး (၅) ရပ်ကို အတူတကွအဆိုပြုကာ ကျင့်သုံးခဲ့ကြပြီး နိုင်ငံကြီးငယ်မရွေး တန်းတူညီမျှမှု၊ အပြန်အလှန် အကျိုးဖြစ်ထွန်းမှုနှင့် ဖွံ့ဖြိုးတိုးတက်မှု စံနမူနာကို ထူထောင်ခဲ့ကြသည်။ တရုတ်နိုင်ငံသည် မြန်မာနိုင်ငံ၏ အချုပ်အခြာအာဏာနှင့် နယ်မြေတည်တံ့ခိုင်မြဲရေးကို လေးစားပြီး မြန်မာနိုင်ငံ၏ ကိုယ်ပိုင်အခြေအနေနှင့် ကိုက်ညီသော ဖွံ့ဖြိုးရေးလမ်းကြောင်းကို ထောက်ခံသည်။ မြန်မာနိုင်ငံရှိ သက်ဆိုင်ရာဘက်အသီးသီးများ၏ ဆန္ဒနှင့်တောင်းဆိုချက် များကိုအခြေခံ၍ မြန်မာနိုင်ငံ မြောက်ပိုင်းဒေသ ငြိမ်းချမ်းရေးလုပ်ငန်းစဉ်မြှင့်တင်ရာတွင် မြန်မာနိုင်ငံအား တက်ကြွစွာကူညီပေးခဲ့သည်။ မည်သည့်အခြေအနေပြောင်းလဲမှုမျိုးတွင်မဆို တရုတ်နိုင်ငံသည် မြန်မာ့ငြိမ်းချမ်းရေး၊ တည်ငြိမ်ရေးနှင့် စီးပွားရေးစဉ်ဆက်မပြတ် ဖွံ့ဖြိုးတိုးတက်ရေး၊ ပြည်သူ့ကောင်းကျိုးသယ်ပိုးရေး စသည့်မူဝါဒသည် ထာဝစဉ် မပြောင်းလဲပါ။

အပြန်အလှန် အကျိုးဖြစ်ထွန်းခြင်း။ တရုတ်-မြန်မာ “Belt and Road” နှင့် စီးပွားရေးစင်္ကြံ အတူတည်ဆောက်ခြင်းတွင် တိုင်ပင်ညှိနှိုင်းမှု၊ ပူးပေါင်းတည်ဆောက်မှုနှင့် အတူတကွမျှဝေမှုကို အမြဲအလေးထား ဆောင်ရွက်လျက်ရှိပြီး တန်းတူညီမျှမှု၊ အပြန်အလှန်အကျိုးဖြစ်ထွန်းမှုနှင့် အောင်မြင်မှုကို ဖော်ဆောင်ရန်ရည်ရွယ်ပါသည်။ တရုတ်နိုင်ငံ၏ ကျယ်ပြန့်သော ဈေးကွက်သည် မြန်မာနိုင်ငံမှ စိုက်ပျိုးရေး၊ မွေးမြူရေးနှင့် ရေထွက်ပစ္စည်းများ ပိုမိုတင်ပို့နိုင်ရန် အခွင့်အလမ်းများကို ဆက်လက်တိုးချဲ့ပေးလျက် ရှိပါသည်။ တရုတ်လုပ်ငန်းရှင်များသည် မြန်မာနိုင်ငံ၏ ကုန်ထုတ်လုပ်ငန်းများတွင် တက်ကြွစွာ ရင်းနှီးမြှုပ်နှံလျက်ရှိပြီး မီးရထား၊ ဆိပ်ကမ်း၊ စက်မှုဇုန်များတည်ဆောက်ရေးတွင် ပါဝင်လျက်ရှိသည်။ လန်ချန်း-မဲခေါင် ပူးပေါင်းဆောင်ရွက်မှု အထူးရန်ပုံငွေသည် “သေးငယ်သော်လည်းကောင်းမွန်သည့်” စီမံကိန်း ၁၁၀ ကျော်ကိုပံ့ပိုးပေးခဲ့သည်။ တရုတ်-မြန်မာ ပူးပေါင်းဆောင်ရွက်မှုသည် မြန်မာနိုင်ငံ၏ အလုပ်အကိုင်ဖန်တီးမှု၊ ပြည်သူ့လူနေမှုဘဝမြှင့်တင်မှုနှင့် စီးပွားရေးဖွံ့ဖြိုးတိုးတက်မှုတို့ အတွက် အထောက်အကူများဖြစ်စေခဲ့သည်။ 

အားလုံးပါဝင်ခြင်းနှင့် အပြန်အလှန်လေ့လာသင်ယူခြင်း။ တရုတ်-မြန်မာ နှစ်နိုင်ငံသည် သမိုင်းကြောင်းရှည်ကြာပြီး မွန်မြတ်တောက်ပသော ယဉ်ကျေးမှုသမိုင်းကို ပိုင်ဆိုင်ထားကြကာ ယဉ်ကျေးမှုဖလှယ်ခြင်းနှင့် အပြန်အလှန် လေ့လာ သင်ယူခြင်းမှာလည်း နှစ်ပေါင်းများစွာရှည်ကြာခဲ့ပြီဖြစ်သည်။ သမိုင်းကိုပြန်ကြည့်လျှင် ထန်မင်းဆက်ခေတ် (Tang Dynasty) က ပျူမြို့ပြနိုင်ငံများ၏ သဘင်ဖျော်ဖြေမှုများသည် ချန်အန်းမြို့တော် (Changan) တွင် လူကြိုက်များခဲ့ပြီး တရုတ်ကဗျာဆရာပိုင်ကျွီးရိ (Bai Juyi) မှ နှစ်ပေါင်း ထောင်ချီကြာရှည်သည်အထိ ကျော်ကြားခဲ့သည့်ကဗျာရေးသားခဲ့သည်။ ယူနန်-မြန်မာ ရှေးဟောင်းလမ်းမကြီးပေါ်၌ မြင်းလှည်းများဖြင့် ပြည့်ကျပ်နေပြီး လက်ဖက်ရည်မွှေးရနံ့များ ပြန့်နှံ့ခဲ့သည်။ နှစ်နိုင်ငံအကြား စာပေ၊ အနုပညာ၊ ဗုဒ္ဓဘာသာအပါအဝင် နယ်ပယ်ကဏ္ဍအသီးသီးတွင် ပူးပေါင်းဆောင်ရွက်မှုများ အဆက်မပြတ်ရှိခဲ့သည်။ ယမန်နှစ်က မြန်မာနိုင်ငံမှ တရုတ်နှစ်သစ်ကူးနေ့ကို မြန်မာနိုင်ငံ၏ အများပြည်သူရုံးပိတ်ရက်အဖြစ် သတ်မှတ်ခဲ့ပြီး တရုတ်နိုင်ငံ၏ ဝူရှူး၊ ပလွေ၊ စောင်းနှင့် မြန်မာမင်းဆက်ခြောက်ဆက်၏ ဂီတအကများ ပွဲတော်စင်မြင့်ထက်တွင် ပူးတွဲဖျော်ဖြေခဲ့ကြသည်။

သဘာဝဘေးအန္တရာယ်သည် အကြင်နာတရား ကင်းမဲ့သော်လည်း ပြည်သူများက မေတ္တာတရားရှိခြင်းကို အာရှ၏ငြိမ်းချမ်းသော၊ သာယာဝပြောသော၊ ဖွံ့ဖြိုးတိုးတက်သော၊ လှပသော၊ ခင်မင်ရင်းနှီးသော “နေရပ်ဌာနေ ၅ ရပ်” တည်ဆောက်ခြင်းဘုံရှုမြင်ချက်တွင် ထင်ဟပ်ပေါ်လွင်စေသည်။ မြန်မာနိုင်ငံ၏ ငလျင်ဘေးဒဏ်သင့်ပြည်သူများအား အာရှနိုင်ငံများမှ ပံ့ပိုးကူညီမှုများပေးအပ်ခဲ့ခြင်းသည် ငြိမ်းချမ်းရေး၊ ပူးပေါင်းဆောင်ရွက်မှု၊ တံခါးဖွင့်လှစ်မှုနှင့် အားလုံးပါဝင်မှုဟူသော အာရှတန်ဖိုးများကို အထင်အရှားပြသခဲ့ပါသည်။ ယနေ့ကမ္ဘာသည် ရာစုနှစ်တစ်ခု၏ အပြောင်းအလဲများ အရှိန်အဟုန်မြင့်တက်လျက်ရှိကာ အာရှသည် ပြန်လည်ရှင်သန်နိုးထခြင်းဟူသော စမှတ်အသစ်ပေါ်၌ရပ်တည်နေပြီး ကြုံတွေ့နေရသော ဖွံ့ဖြိုးတိုးတက်မှုအခွင့်အလမ်းများနှင့် စွန့်စားစိန်ခေါ်မှုများမှာ ယခင်ကတစ်ခါမျှမကြုံတွေ့ခဲ့ဖူးပါ။ ဧပြီလဆန်းပိုင်းတွင် ကျွန်မသည် တရုတ်နိုင်ငံ၏ အိမ်နီးချင်းနိုင်ငံများနှင့်ပတ်သက်သည့် လုပ်ငန်းဆိုင်ရာဗဟိုညီလာခံ （The Central Conference on Work Related to Neighboring Countries）သို့ တက်ရောက်ခဲ့ပါသည်။ အဆိုပါအစည်းအဝေးတွင် အိမ်နီးချင်းနိုင်ငံများနှင့် မဟာဗျူဟာမြောက်ယုံကြည်မှုကို ခိုင်မာစေရန်၊ ဒေသတွင်းနိုင်ငံများ၏ကိုယ်ပိုင်ဖွံ့ဖြိုးရေးလမ်းကြောင်းကို မှန်ကန်စွာ လျှောက်လှမ်းနိုင်ရန် ထောက်ခံအားပေးခြင်းနှင့် အငြင်းပွားမှုများကို ထိရောက်စွာ စီမံခန့်ခွဲရန်၊ ဖွံ့ဖြိုးတိုးတက်ရေးပေါင်းစည်းမှုကို နက်ရှိုင်းစေရန်၊ အဆင့်မြင့်ဆက်သွယ်ရေး လမ်းကြောင်းများဖော်ဆောင်ခြင်း၊ ထုတ်လုပ်မှုလုပ်ငန်းစဉ်နှင့် ထောက်ပံ့ရေးကွန်ရက်များ ပူးပေါင်းဆောင်ရွက်ခြင်းတို့ကိုအားဖြည့်ရန်၊ ဒေသတွင်းတည်ငြိမ်မှုကို အတူတကွ ထိန်းသိမ်းရန်၊ လုံခြုံရေးနှင့်ဥပဒေစိုးမိုးရေးဆိုင်ရာ ပူးပေါင်းဆောင်ရွက်မှုများ ဆောင်ရွက်ခြင်း ဖြင့် စိန်ခေါ်မှုအသီးသီးများကို ရင်ဆိုင်ရန်၊ လူမှုဆက်ဆံရေး ပြန့်ပွားစေရန်နှင့် နိုင်ငံသားများ အပြန်အလှန်သွားလာမှုအား လွယ်ကူချောမွေ့စေရန်တို့ကို အလေးပေးဆွေးနွေးခဲ့ကြပါသည်။

တရုတ်နိုင်ငံသည် ကမ္ဘာကြီးမတည်ငြိမ်မှုနှင့်ပြောင်းလဲမှုများကြား တည်ငြိမ်သော အင်အား၊ ပူးပေါင်းဆောင်ရွက်သောအင်အားနှင့် တိုးတက်သောအင်အားအဖြစ် ဆက်လက် ရပ်တည်သွားမည်ဖြစ်ကာ အိမ်နီးချင်းနှင့်ညီညွတ်ရေး၊ တည်ငြိမ်အေးချမ်းရေး၊ သာယာဝပြောရေးမူဝါဒကို အမြဲကိုင်စွဲကျင့်သုံးကာ မြန်မာနိုင်ငံအပါအဝင် အိမ်နီးချင်းနိုင်ငံများ နှင့် ချစ်ကြည်ရင်းနှီးသောပူးပေါင်းဆောင်ရွက်မှုကို နက်ရှိုင်းစေ၍ ကမ္ဘာလုံးဆိုင်ရာ ဖွံ့ဖြိုးတိုးတက်ရေးအစီအမံ (GDI)၊ ကမ္ဘာလုံးဆိုင်ရာ လုံခြုံရေးအစီအမံ (GSI)၊ ကမ္ဘာလုံးဆိုင်ရာ လူသားယဉ်ကျေးမှုအစီအမံ (GCI) တို့ကို အတူတကွ အကောင်အထည်ဖော် ဆောင်ရွက်သွားမည်ဖြစ်ပြီး တရုတ်ပုံစံခေတ်မီမှု၏ အကျိုးရလဒ်များဖြင့်  အိမ်နီးချင်းနိုင်ငံ များအား ပိုမိုအကျိုးပြုသွားမည်ဖြစ်သည်။ ထို့အပြင် ကမ္ဘာ့တောင်ဘက်ခြမ်း၏ စည်းလုံးညီညွတ်မှုနှင့် မိမိကိုယ်ကိုအားကိုးအားထားမှုအား ပိုမိုအားဖြည့်ပြီး ဒေသ ငြိမ်းချမ်းရေးနှင့်တည်ငြိမ်ရေးကို အတူတကွထိန်းသိမ်းကာ အာရှခေတ်မီမှုဖွံ့ဖြိုးတိုးတက်မှု လမ်းစဉ်ကို ပူးပေါင်းမြှင့်တင်သွားမည်ဖြစ်ပါသည်။

ငလျင်သည် ကမ္ဘာမြေကြီးကိုအက်ကွဲစေခဲ့သော်လည်း တရုတ်-မြန်မာ ဆွေမျိုးပေါက်ဖော် ချစ်ကြည်ရေးကို ဖြတ်တောက်၍မရသလို ကံကြမ္မာတူဖေးမကူသော စိတ်ဓာတ်နှင့် ယုံကြည်မှုကိုလည်း မလှုပ်ခပ်နိုင်ပါ။ တရုတ်နိုင်ငံသည် မြန်မာနိုင်ငံသို့ Prefabricated House များ၊ ရွေ့လျားခွဲစိတ်ခန်းများအစရှိသော အထောက်အပံ့များ ဆက်လက်ထောက်ပံ့ ပေးသွားမည်ဖြစ်ပြီး၊ အဆောက်အဦဆိုင်ရာ စစ်ဆေးရေး ကျွမ်းကျင်ပညာရှင်များနှင့် ယဉ်ကျေးမှုအမွေအနှစ် ထိန်းသိမ်းရေးပညာရှင်များကို မြန်မာနိုင်ငံသို့စေလွှတ်၍ ငလျင်ဘေးဒဏ်ကြောင့်ပျက်စီးခဲ့သော အဆောက်အဦများ တည်ဆောက်ရေးနှင့် ပြန်လည်ထူထောင်ရေးလုပ်ငန်းများ၌ ပါဝင်ကူညီပြီး မြန်မာပြည်သူများ ပုံမှန်လူနေမှုဘဝသို့ မြန်ဆန်စွာ ပြန်လည်ရောက်ရှိစေရန် ပံ့ပိုးကူညီသွားမည်ဖြစ်သည်။ ကျွန်မတို့သည် တရုတ်-မြန်မာ သံတမန်ဆက်ဆံရေးထူထောင်ခြင်း ၇၅ နှစ်ပြည့် အထိမ်းအမှတ်ကို ဤနှစ်တွင် အတူတကွ ဂုဏ်ပြုကျင်းပခြင်းအပေါ်အခြေခံကာ နှစ်နိုင်ငံဆက်ဆံရေးကို ပိုမိုကြီးမားသော တိုးတက်မှုများရရှိစေရန် လုပ်ဆောင်သွားမည်။ ခေတ်သစ် တရုတ်-မြန်မာ အေးအတူပူအမျှ အသိုက်အဝန်းတည်ဆောက်ခြင်းကို တည်ငြိမ်စွာနှင့်ခရီးပေါက်ရောက်စေရန် တွန်းအားပေး ဆောင်ရွက်သွားမည်ဖြစ်သည်။